រាជធានីភ្នំពេញ ៖ ការប្រព្រឹត្តអំពើពុករលួយក្នុង រូបភាពសូកប៉ាន់និងស៊ីសំណូកក្រោមតុ នឹងត្រូវលុបបំបាត់ ហើយកម្មវិធីមេរៀនស្តីពីការប្រឆាំងអំពើពុករលួយនឹងត្រូវ ដាក់បញ្ចូលក្នុងកម្មវិធីសិក្សាថ្នាក់វិទ្យាល័យ នៅឆ្នាំ២០១៤ដើម្បីអប់រំក្មេងជំនាន់ក្រោយឲ្យមានគំនិតស្អប់ ខ្ពើមអំពើពុករលួយ ហើយងាកមកស្រឡាញ់ភាពស្អាតស្អំ។នេះបើតាមការប្រកាសរបស់ឯកឧត្តមឱម យ៉ិនទៀង ប្រធានអង្គភាពប្រឆាំងអំពើពុករលួយនៅក្នុងសិក្ខាសាលាស្ដីពីការ វាយតម្លៃនិងត្រួតពិនិត្យលើកិច្ចខិតខំ ប្រឹងប្រែងប្រយុទ្ធប្រឆាំងអំពើពុករលួយ ដែលធ្វើរយៈពេល ២ថ្ងៃ នៅរាជធានីភ្នំពេញ ចាប់ពីថ្ងៃទី៩ ដល់ថ្ងៃទី១០ ខែតុលាឆ្នាំ២០១៣។
ចំពោះមុខសិក្ខាសាលាអ្នកមកពីស្ថាប័នរដ្ខនិងឯកជនអង្គការសង្គមស៊ីវិលប្រមាណ ជាង ១០០នាក់ឯកឧត្តមឱម យ៉ិនទៀង បានអះអាងថា អង្គភាពប្រឆាំងអំពើពុករលួយនឹងខិតខំលុបបំបាត់ឲ្យអស់នូវការសូកលុយ ក្រោមតុដែលមានចរិតជាបទល្មើសពុករលួយ និងមានចែងនៅក្នុងច្បាប់តាមកម្មវិធីគោលនយោបាយរបស់រដ្ឋាភិបាល អាណត្តិថ្មី។ លោកបានព្រមានជាសាធារណៈចំពោះអ្នកធ្លាប់ប្រព្រឹត្តអំពើពុករលួយ ឲ្យចេះកែខ្លួនមុននឹងអង្គភាពរបស់លោកស៊ើបអង្កេតរកឃើញភស្តុតាង បង្ហាញ ពីបទល្មើសពុករលួយ។ឯកឧត្តម ឱម យ៉ិនទៀងបានមានប្រសាសន៍ឲ្យដឹងថា៖ រដ្ឋាភិបាលអាណិតអាសូរណាស់មន្ត្រីខ្លួន អនុគ្រោះ ។
គាត់ថា ត្រូវការចាំបាច់ចុះងូតទឹកដុសក្អែលខ្លួនឯង អស់ក្អែលកុំឲ្យមានបញ្ហា បើដុសក្អែលមិនជ្រះទេឲ្យគេដុសឲ្យ ពិន័យដកចេញ ហើយ យកទៅព្យាបាលវះកាត់ដោយអង្គភាពប្រឆាំងអំពើពុករលួយដាក់ទៅតុលាការ។ បញ្ហាអំពើពុករលួយនៅស្រុកខ្មែរគឺជាប្រធានបទក្តៅ និងរសើបបំផុតដែលធ្វើឲ្យប្រជាពលរដ្ឋមិនសប្បាយចិត្ត។អង្គភាពប្រឆាំង អំពើពុករលួយ កំពុងប្តេជ្ញាចិត្តធ្វើកំណែទម្រង់បោសសំអាតមន្រ្តី ពុករលួយតាមរយះនៃការដាក់ចេញយុទ្ធសាស្ត្រចតុកោណដំណាក់កាលទី៣នាអាណត្តិ ទី៥ នេះ៕
