មានបំរាមមួយត្រូវបានចេញដោយនាយក សាលា ហាមនិស្សិតស្រីទាំងអស់ស្លៀកសំពត់ខ្លីៗចូលរៀន បង្កឲ្យមានការខឹងសម្បារពីពួកគេ ទើបឈានដល់ការស្លៀកពាក់តែខោអាវក្នុងចូលរៀន។ និស្សិតនៃមហាវិទ្យាល័យមួយនៅប្រទេសហុងគ្រី បាននាំគ្នាស្លៀកពាក់តែខោអាវក្នុង (អាវទ្រនាប់ និងខោស្លីប) ចូលរៀន ដើម្បីប្រឆាំងនិងច្បាប់ផ្ទៃក្នុងរបស់សាលា ដែលចេញដោយនាយកសាលា ហាមពួកគេមិនឲ្យចូលរៀនបើស្លៀកសំពត់ខ្លី។
ក្នុងបំរាមមួយទៅកាន់ពួកនិស្សិត កាលពីថ្ងៃពុធ នាយកមហាវិទ្យាល័យ Kaposvar University នៅភាគនិរតី នៃប្រទេសហុងគ្រី បានចែងថាច្បាប់ស្តីពីសម្លៀកបំពាក់បែបអភិរក្ស គឺខោអាវធំពណ៌ក្រម៉ៅ និងស្បែកជើងខ្វៀ សំរាប់បុរស អាវកាក់និងខោ ឬសំពត់វែងសំរាប់ស្ត្រីត្រូវតែគោរពអោយបានខ្ជាប់ខ្ជួននៅពេលចូលរៀន ឬប្រឡង។
បំរាមនេះ បានដាក់កំហិតថា «ចាប់ពីថ្ងៃ០១តុលាទៅ សកលវិទ្យាល័យសង្ឃឹមថានឹងមិនមាននិស្សិតណាពាក់សំពត់ខ្លី ស្បែកជើងផ្ទាត់ ការផាត់មុខខ្លាំងនិងគ្រឿងតុបតែងមិនសមរម្យចូលរៀនទេ»។ ការដាក់បំរាមនេះ មិនបានធ្វើឲ្យនិស្សិតដែលនិយមចូលចិត្តស្លៀកសំពត់ខ្លី ទ្រនាប់ជើងកែវខ្ពស់ សប្បាយរីករាយនោះទេ ទើបពួកគេសម្រេចចិត្តស្លៀកតែខោអាវក្នុងដើម្បីប្រឆាំង។
តើលោកអ្នកយល់យ៉ាងណាដែរចំពោះទង្វើរបស់និស្សិតមួយក្រុមនេះ?
ប្រភពពី៖ នាវា
